រដ្ឋមន្រ្តីប្រតិភូអមនាយករដ្ឋមន្រ្តី ក្រើនរម្លឹក អាជ្ញាធរ សមត្ថកិច្ចពាក់ព័ន្ធតាមមូលដ្ឋាន មិនត្រូវពាក់ព័ន្ធជាមួយគ្រប់បទល្មើសជាដាច់ខាត

ឯកឧត្តមនាយឧត្តមសេនីយ៍ជួន សុវណ្ណ រដ្ឋមន្រ្តីប្រតិភូអមនាយករដ្ឋមន្រ្តី និងប្រធានក្រុមការងារពិសេសតាមដានការអនុវត្តគោលការណ៍របស់នាយករដ្ឋមន្ត្រី ពាក់ ព័ន្ធការងារសន្តិសុខ សណ្តាប់ធ្នាប់សង្គម បានបញ្ជាក់ថា វិធានការយើងបង្រ្កាប ឱ្យមានប្រសិទ្ធបំផុតនោះ គឺអាជ្ញាធរ សមត្ថកិច្ចពាក់ព័ន្ធតាមមូលដ្ឋាន មិនត្រូវពាក់ព័ន្ធជាមួយ គ្រប់បទល្មើសជាដាច់ខាត ទើបការបង្រ្កាបនោះ មានតម្លាភាព ប្រសិទ្ធភាព ទប់ស្កាត់បានទាន់ពេលវេលា។

មានប្រសាសន៍យ៉ាងដូច្នេះក្នុងឱកាសឯកឧត្តមនាយកឧត្តមសេនីយ៍ ជួន សុវណ្ណ អញ្ជើញជាអធិបតីក្នុងកិច្ចប្រជុំគណៈបញ្ជាការឯកភាពរដ្ឋបាលខេត្តបន្ទាយមានជ័យ ជា មួយក្រុមការងារពិសេសតាមដានការអនុវត្តគោលការណ៍របស់នាយករដ្ឋមន្ត្រីពាក់ព័ន្ធកិច្ចការសនិ្តសុខ សណ្ដាប់ធ្នាប់សង្គម ដែលបានធ្វើឡើងនៅសាលាខេត្ត កាលពីរសៀលថ្ងៃទី២៨ ខែសីហា ឆ្នាំ២០២៤នេះ ដែលមានការចូលរួមឯកឧត្តមអភិបាលខេត្ត លោកអភិបាលរងខេត្តប្រធានមន្ទីរ មេបញ្ជាការកង កម្លាំងទាំង៣ប្រភេទ អភិបាលក្រុង-ស្រុកទាំង៩ ប៉ុស្តិ៍នគរបាល មេឃុំ-ចៅសង្កាត់ទាំង៦៧ទូទាំងខេត្ត ។

នៅក្នុងឱកាសនោះ ឯកឧត្តមនាយឧត្តមសេនីយ៍ ជួន សុវណ្ណ បានថ្លែងថា យោងតាមបទបញ្ជាសម្តេចមហាបវរធិបតី ហ៊ុន ម៉ាណែតនាយករដ្ឋមន្រ្តីនៃកម្ពុជា រួចមក គណ:កម្មការគ្រប់គ្រងល្បែងពាណិជ្មកម្ម កម្ពុជា ត្រូវបិទ និងនិរាករណ៍ អាជ្ញាប័ណ្ណនោះ ដែលជាអាជីវកម្មល្បែងឆ្នោតផ្សងសំណាង និងល្បែងស៊ីសងខុសច្បាប់គ្រប់ ប្រភេទក្នុងទូទាំងប្រទេស ពិសេសនៅភូមិសាស្ត្រខេត្តបន្ទាយមានជ័យ ព្រមទាំងជំរុញឱ្យអាជ្ញាធរពាក់ព័ន្ធគ្រប់លំដាប់ថ្នាក់បានចុះធ្វើបច្ចុប្បន្នភាពក្នុងខេត្ត និង ធ្វើការបិទទាំងស្រុងរាល់ល្បែងខុសច្បាប់ទាំងអស់នោះ។

ឯកឧត្តមនាយឧត្តមសេនីយ៍ ជួន សុវណ្ណ បានបន្តថា យើងមិនធ្វើតែរាល់ល្បែងខុសច្បាប់នោះទេ គឺត្រូវរួមគ្នាបង្រ្កាប បទល្មើសផ្សេងទៀតដូចជា អ្នកចែកចាយគ្រឿងញៀន ក្មេងទំនើង ត្រូវដាក់ទោសឱ្យធ្ងន់បំផុត ដោយអនុវត្តន៍តាមពាក្យ ស្លោកថា ៣កុំ គឺ កុំពាក់ព័ន្ធ ,កុំអន្តរាគមន៍ ,កុំបន្ធូរបន្ថយទោស (ជាសមត្ថកិច្ចតុលាការ) និង១រាយការណ៍ បើឃើញបទល្មើសហើយត្រូវរាយការណ៍ជូនសមត្ថកិច្ចបន្ទាន់។

ឯកឧត្តម អ៊ុំ រាត្រី អភិបាលខេត្ត និងជាប្រធានគណៈបញ្ជាការឯកភាព រដ្ឋបាលខេត្តបន្ទាយមានជ័យ បានមានប្រសាសន៍ថា ក្នុងឆមាសទី១ ដើមឆ្នាំ២០២៤ គណៈបញ្ជាការឯកភាពរដ្ឋបាលខេត្ត រក្សាបាននូវសន្តិសុខ សណ្តាប់ធ្នាប់សង្គម និងសុវត្ថិភាពសាធារណៈ។ បទល្មើសនានាមានការថយចុះ ជាពិសេសគ្រោះថ្នាក់ចរាចរ ក្មេងទំនើង ល្បែងស៊ីសងខុសច្បាប់ផ្សេងៗ តាមរយៈសកម្មភាពនៃការអនុវត្ត នូវគោលនយោបាយភូមិ ឃុំ សង្កាត់មានសុវត្ថិភាព ព្រមទាំងមានការសហការយ៉ាងជិតស្និទ្ធ និងមានទំនាក់ទំនងល្អជាមួយគ្រប់សមាសភាពពាក់ព័ន្ធទាំងអស់ក្នុងខេត្ត។

ទន្ទឹមនឹងនេះ រដ្ឋបាលខេត្ត ក៏មានកិច្ចការងារជាច្រើនទៀតដែលត្រូវអនុវត្តន៍បន្ត និងត្រូវខិតខំព្យាយាមដោះស្រាយនូវបញ្ហាប្រឈមនានា ឱ្យស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា សំដៅលើកកម្ពស់ កិច្ចអភិវឌ្ឍន៍ខេត្តឱ្យកាន់តែរីកចម្រើនថែមទៀតនោះ៕

(សូមអានបន្ត)

ថ្នាក់ដឹកនាំក្រសួងសុខាភិបាល ចុះត្រួតពិនិត្យការរៀបចំទីតាំងផ្នែកចត្តាឡីស័កនៅអាកាសយានដ្ឋានអន្តរជាតិភ្នំពេញ ដើម្បីឆ្លើយតបនឹងជំងឺអឹមផក (Mpox)

នៅអាកាសយានដ្ឋានអន្តរជាតិ ភ្នំពេញ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងប្រតិភូសុខាភិបាលកាលពីព្រឹកថ្ងៃអង្គារ ទី២៧ ខែសីហា ឆ្នាំ២០២៤ បានអញ្ជើញចុះត្រួតពិនិត្យការរៀបចំទីតាំងផ្នែកចត្តាឡីស័ក ដើម្បីឆ្លើយតបនឹងជំងឺអឹមផក (Mpox) ។

គោលបំណងនៃការចុះត្រួតពិនិត្យ៖

– ដើម្បីពិនិត្យរួមគ្នា ក្នុងការទប់ស្កាត់ការនាំចូលជំងឺអឹមផក ( Mpox clade1.B) ចូលមកកម្ពុជា នៅតាមច្រកទាំងអស់ និងវិធានការការពារ ក៏ដូចជាផ្ញើសារក្រើនរំលឹកដល់អ្នក ដំណើរទាំងអស់។

– ពង្រឹងយន្តការបន្ថែមទៀតយ៉ាងម៉ត់ចត់ក្នុងការតាមដានកំដៅ ដោយប្រព័ន្ធកាមេរ៉ា និងការអង្កេត តាមដាន រាល់អ្នកដំណើរគ្រប់ច្រកចេញចូលទាំងអស់។

– ក្នុងករណីមានការសង្ស័យ មន្ត្រីចត្តាទ្បីស័ករបស់ក្រសួងសុខាភិបាល នឹងចាត់ចែងអនុវត្តតាមគោលការណ៍ណែនាំក្នុងការទប់ស្កាត់នឹងឆ្លើយតបទៅនឹងការរាតត្បាតនៃជំងឺឆ្លងជាបន្ទាន់ ។

– ក្រុមការងារបានឯកភាពបន្ថែម ម៉ាស៊ីនស្កែនកំដៅ នឹងរៀបចំ តំទ្បើងរូបភាព សារជាវីដេអូសំខាន់ៗ ជាសារអប់រំ និងវិធានការនានា ដល់គ្រប់អ្នកដំណើរ ស្តីពីជំងឺអឹមផក (Mpox) ។

ក្នុងនេះដែរ ក៏មានការអញ្ជើញចូលរួមពី ឯកឧត្តមតំណាងរដ្ឋលេខាធិការដ្ឋានអាកាសចរស៊ីវិល ឯកឧត្តមតំណាងអគ្គនាយកដ្ឋាននគរបាលអន្តោប្រវេសន៍ តំណាងអគ្គនាយកដ្ឋានគយនិងរដ្ឋាករកម្ពុជា តំណាងក្រុមហ៊ុនបារាំង និងសហការី តំណាងនាយកដ្ឋានប្រយុទ្ធជំងឺឆ្លង (CDC) ព្រមទាំងក្រុមការងារចត្តាទ្បីស័ក ប្រចាំអាកាសយានដ្ឋានអន្តរជាតិភ្នំពេញ និងមន្ត្រីពាក់ព័ន្ធទាំងអស់។

(សូមអានបន្ត)

ជំនួបពិភាក្សាការងាររវាង ថ្នាក់ដឹកនាំក្រសួងសាធារណការ និងដឹកជញ្ជូន ជាមួយអនុប្រធានបេសកកម្មនៃស្ថានទូតជប៉ុនប្រចាំកម្ពុជា

លោកជំទាវ កុយ សុដានី រដ្ឋលេខាធិការប្រចាំការ តំណាង ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានទទួលជួប ពិភាក្សាការងារ ជាមួយលោក Mr.Nagase Kensuke អនុប្រធានបេសកកម្មនៃស្ថានទូតជប៉ុនប្រចាំកម្ពុជា (Minister/Deputy Chief of Mission,EOJ) ដោយមានការចូលរួមផងដែរពីឯកឧត្តម ជាថ្នាក់ដឹកនាំ លោក-លោកស្រីតំណាងអគ្គនាយកដ្ឋាន និងមន្ត្រីជំនាញពាក់ព័ន្ធក្រោមឱវាទក្រសួងជាច្រើនរូប នារសៀល ថ្ងៃទី២៧ ខែសីហា ឆ្នាំ២០២៤ ។ ជំនួបពិភាក្សានេះ ធ្វើឡើងក្នុងគោលបំណងដើម្បីសិក្សាអំពីការពង្រឹងកិច្ចសហប្រតិបត្តិការលើគម្រោងជំនួយបច្ចេកទេស និងគម្រោងអភិវឌ្ឍវិស័យហេដ្ឋារចនាសម្ព័ន្ធផ្លូវ ថ្នល់ ស្ពាន ភស្តុភារកម្មកម្ពុជា ការងារដែលកំពុងអនុវត្តពាក់ព័ន្ធលើការដឹកជញ្ជូនផ្លូវដែក កំពង់ផែ គម្រោងពង្រីក និងកែលម្អកំណាត់ផ្លូវមួយចំនួននៅក្នុងប្រទេសកម្ពុជា ការប្រមូលធាតុចូល និងការគាំទ្រផងដែរ។ ជាមួយគ្នានេះ ភាគីជប៉ុន បានបង្ហាញចំណាប់អារម្មណ៍ចំពោះការអភិវឌ្ឍយ៉ាងឆាប់រហ័ស និងសារៈសំខាន់លើវិស័យហេដ្ឋារចនាសម្ព័ន្ធ ការងារវិស័យដឹកជញ្ជូនផ្លូវដែក ភស្តុភារកម្មកម្ពុជា ក៏ដូចជាគម្រោងនានាផងដែរ ។ លោកជំទាវរដ្ឋលេខាធិការប្រចាំការ បានលើកឡើងពីបច្ចុប្បន្នភាពទាក់ទងនឹងការអភិវឌ្ឍហេដ្ឋារចនាសម្ព័ន្ធរបស់កម្ពុជា និងគម្រោងសំខាន់ៗមួយចំនួន និងបានស្នើទៅកាន់ភាគីជប៉ុនឱ្យបន្តផ្តល់ការគាំទ្រទាំងផ្នែកបច្ចេកទេស និងហិរញ្ញវត្ថុដល់វិស័យសាធារណការ និងដឹកជញ្ជូន ពិសេសគាំទ្រដល់ការអនុវត្តគម្រោងហេដ្ឋារចនាសម្ព័ន្ធ ផ្លូវថ្នល់ ស្ពាន ការងារដឹកជញ្ជូនលើផ្លូវដែក ភស្តុភារកម្មកម្ពុជា និងដែលបានកំណត់ក្នុងផែនការមេគ្រប់ជ្រុងជ្រោយ សំដៅចូលរួមចំណែកដល់ការអភិវឌ្ឍសេដ្ឋកិច្ចកម្ពុជាឱ្យកាន់តែមានការរីកចម្រើនថែមទៀត៕

CATEGORIESពត៌មានថ្មីៗ

(សូមអានបន្ត)

រដ្ឋមន្ដ្រីក្រសួងកិច្ចការនារី ដឹកនាំគណៈប្រតិភូកម្ពុជា ចូលរួមកិច្ចប្រជុំកំពូលស្រ្តី អាស៊ានលើកទី៣ នៅទីក្រុងវៀងចន្ទ ប្រទេសឡាវ

(ឡាវ)៖ លោកស្រីកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាតំណាងកម្ពុជា សម្រាប់កិច្ចប្រជុំថ្នាក់រដ្ឋមន្រ្តីអាស៊ាន (AMMW) នៅថ្ងៃទី២៣ ខែសីហា ឆ្នាំ២០២៤ បានដឹកនាំគណៈប្រតិភូកម្ពុជា ចូលរួមកិច្ចប្រជុំកំពូលស្រ្តីអាស៊ានលើកទី៣ (The 3rd ASEAN Women Leaders’ Summit) ក្រោមមូលបទ «ការពង្រឹងសេដ្ឋកិច្ចគិតគូរពីសុខុមាលភាព និងភាពធន់ឆ្ពោះទៅសហគមន៍អាស៊ានក្រោយឆ្នាំ២០២៥» ដែលប្រព្រឹត្តទៅនៅទីក្រុងវៀងចន្ទ សាធារណរដ្ឋប្រជាធិបតេយ្យប្រជាមានិតឡាវ។

កិច្ចប្រជុំកំពូលស្រ្តីអាស៊ានលើកទី៣ មានគោលបំណង ដើម្បី៖

១៖ ទទួលស្គាល់តួនាទីដ៏សំខាន់ និងភាពខ្លាំងរបស់មេដឹកនាំស្ត្រី និងស្ត្រីទាំងអស់ក្នុងតំបន់អាស៊ាន ក្នុងការស្តារឡើងវិញក្រោយជំងឺរាតត្បាតកូវីដ-១៩។

២៖ លើកឡើងជាថ្មីនូវការប្តេជ្ញាចិត្តរបស់អាស៊ានក្នុងការគាំទ្រស្ត្រី និងក្មេងស្រីនៅក្នុងសេដ្ឋកិច្ចគិតគូរពីសុខុមាលភាពដែលមានប្រាក់កម្រៃ និងមិនមានប្រាក់កម្រៃ ដែលជារបៀបវារៈដ៏សំខាន់ក្នុងថ្នាក់តំបន់។

៣៖ ទទួលស្គាល់លើបញ្ហាប្រឈម និងកាលានុវត្ថភាព ក្នុងការគាំទ្រស្ត្រី និងក្មេងស្រីក្នុងបរិបទនៃការកសាងភាពធន់។

៤៖ អនុម័តសេចក្តីថ្លែងការណ៍ចុងក្រោយដែលកំណត់អនុសាសន៍ជាក់លាក់សម្រាប់ដោះស្រាយបញ្ហាប្រឈមរបស់ស្ត្រី និងក្មេងស្រីនៅក្នុងបរិបទនៃសេដ្ឋកិច្ចគិតគូរ ពីសុខុមាលភាពដែលមានប្រាក់កម្រៃ និងមិនមានប្រាក់កម្រៃ ព្រមទាំងការកសាងភាពធន់។

នៅក្នុងកិច្ចប្រជុំកំពូលស្រ្តីអាស៊ានលើកទី៣ លោកស្រីកិត្តិបណ្ឌិតរដ្ឋមន្រ្តី បានធ្វើបទអន្តរាគមន៍ ស្ដីពីការពង្រឹងសេដ្ឋកិច្ចគិតគូរពីសុខុមាលភាព និងភាពធន់ឆ្ពោះទៅ សហគមន៍ អាស៊ាន ក្រោយឆ្នាំ២០២៥ ដោយបានបង្ហាញពីការយកចិត្តទុកដាក់ របស់រដ្ឋាភិបាលកម្ពុជា តាមរយៈយុទ្ធសាស្ត្របញ្ចកោណ ដំណាក់កាលទី១ និងផែនការសកម្មភាពនារីរតនៈទី៦ ឆ្នាំ២០២៤-២០២៨ ដោយមានសេដ្ឋកិច្ចគឺជាអាទិភាព ដ៏សំខាន់។

ជាមួយគ្នានេះដែរ លោកស្រីកិត្តិបណ្ឌិត ក៏បានបញ្ជាក់ផងដែរថា កម្ពុជាកំពុងតែបញ្ចប់នូវ ក្របខណ្ឌផែនការសកម្មភាពសេដ្ឋកិច្ចជាតិ នៃសេដ្ឋកិច្ចគិតគូរពីសុខុមាលភាព និងការងារមើលថែ ដែលមិនទទួលបាន ប្រាក់កម្រៃ ដែលយកចិត្តទុកដាក់ លើ៖ ១. ហេដ្ឋារចនាសម្ព័ន្ធ ផ្នែកថែទាំសុខុមាលភាព (Care Infrastructure) ២. វិធានការគាំពារ និងថែទាំពាក់ព័ន្ធ នឹងគាំពារសង្គម (Care-related social protection) ៣. សេវាផ្នែកថែទាំ (Care Services) និង ៤. គោលនយោបាយពាក់ព័ន្ធនឹងថែទាំ នៅក្នុងការងារ (Employment-related to care policies)។

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានផ្ដល់កិត្តិយសដ៏ខ្ពងខ្ពស់ថ្លែងសុន្ទរកថា លើសេចក្ដីព្រាងសេចក្ដីថ្លែងការណ៍ស្ដីពី «ការពង្រឹងសេដ្ឋកិច្ចគិតគូរពីសុខុមាលភាព និងភាពធន់ឆ្ពោះទៅសហគមន៍អាស៊ានក្រោយឆ្នាំ២០២៥» ដោយផ្ដោតសំខាន់ក្នុងការវិនិយោគលើការងារមើលថែ (Care Work) គឺជាវិធីសាស្រ្តស្នូលមួយ សម្រាប់សមភាពយេនឌ័រការអភិវឌ្ឍមូលធនមនុស្ស សុខុមាលភាព និងកំណើនសេដ្ឋកិច្ចប្រកបដោយនិរន្តរភាព៕

(សូមអានបន្ត)

ឯកឧត្តមឧបនាយករដ្ឋមន្ត្រី ស៊ុន ចាន់ថុល៖ រាជរដ្ឋាភិបាលនឹងទូទាត់សង រាល់ផលប៉ះពាល់របស់ប្រជាពលរដ្ឋ ក្នុងគម្រោងព្រែកជីកហ្វូណនតេជោ

ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍​កម្ពុជា បានអះអាងថា រាជរដ្ឋាភិបាលនឹងទូទាត់សងរាល់ផលប៉ះពាល់ក្នុងគម្រោង​សាង​សង់​ព្រែកជីកហ្វូណនតេជោ។ តែទោះជាយ៉ាងណា ឯកឧត្តម ស៊ុន ចាន់ថុល បានសុំការ​យោគយល់ចំពោះប៉ះពាល់ទាំងឡាយ ហើយរាជរដ្ឋាភិបាលនឹងព្យាយាម​កាត់បន្ថយ​ផល​ប៉ះពាល់ឱ្យបានខ្ពស់បំផុត។

ក្នុងដំណើរចុះពិនិត្យតម្រាយផ្លូវទឹកនៃគម្រោងព្រែកជីកហ្វូណនតេជោនៅថ្ងៃទី២៦ ខែ​សីហា ឆ្នាំ២០២៤នេះ ឯកឧត្តមឧបនាយករដ្ឋមន្ត្រី ស៊ុន ចាន់ថុល បានស្នើទៅប្រជា​ពល​រដ្ឋកុំឱ្យមានការព្រួយបារម្ភលើសំណងនៃផលប៉ះពាល់។ ឯកឧត្តមបានឱ្យដឹងថា មន្ត្រី​ក្រសួងសេដ្ឋកិច្ច និងហិរញ្ញវត្ថុ នឹងចុះទៅសិក្សារាល់ផលប៉ះពាល់របស់ប្រជាពលរដ្ឋ ហើយ​ទូទាត់សងលើការប៉ះពាល់នោះ សូម្បីតែដើមឈើហូបផ្លែនានា ក៏នឹងត្រូវទូទាត់​សង​ផងដែរ។

ឯកឧត្តមឧបនាយករដ្ឋមន្ត្រី បានគូសបញ្ជាក់បែបនេះ «រាជរដ្ឋាភិបាលយើងដោះស្រាយ​តាម​​គោលនយោបាយ តាមច្បាប់តម្លាប់ដែលយើងមាន មិនមែនរំលោភយកដីពី​បងប្អូន​ប្រជាពលរដ្ឋមកកសាងព្រែកជីកនោះទេ។ សូមកុំជឿការញុះញង់រដ្ឋាភិបាលរំលោភ​យក​ដី មិនសងថវិកា មិនមែនទេ មិនមែនដាច់ខាត»។

សូមបញ្ជាក់ថា ព្រែកជីកហ្វូណនតេជោ ដែលជាកំណប់ទ្រព្យដ៏មានគុណតម្លៃផ្នែក​សេដ្ឋ​កិច្ច​របស់ខ្មែរ ត្រូវ​បានប្រកាសបើកការដ្ឋានជាផ្លូវការយ៉ាងមហោឡារិក កាលពីថ្ងៃទី៥ ខែសីហា ឆ្នាំ​២០២៤ ក្រោមអធិបតីភាពសម្តេចធិបតី ហ៊ុន ម៉ាណែត នាយករដ្ឋមន្ត្រី​កម្ពុជា និង​លោក​ជំទាវបណ្ឌិត ពេជ ចន្ទមុន្នី ហ៊ុនម៉ាណែត ក្រោមសម្រែកសាទរយ៉ាង​មហស្ចារ្យ​នៅ​ទូទាំងនគរខ្មែរ។

គម្រោងនេះ នឹងធ្វើលើផ្លូវទឹកធម្មជាតិដែលមានស្រាបប្រវែងប្រមាណ​១៣៥​គីឡូ​ម៉ែត្រ។ តម្រាយនៃការសាងសង់ព្រែកជីកនេះ ភាគច្រើនជាវាលបឹង និងវាលស្រែ សម្រាប់លំនៅឋានប្រជាពលរដ្ឋប៉ះពាល់ច្រើននៅទីប្រជុំជន។

ឯកឧត្តមឧបនាយករដ្ឋមន្ត្រី ស៊ុន ចាន់ថុល ធ្លាប់បានឱ្យដឹងថា គម្រោងព្រែកជីកនេះ ប៉ះពាល់ប្រហែលជា ១,៥០០ខ្នង ស្ពាន៣កន្លែង រោងចក្រ១ ដីលំនៅឋាន ១៤៩.៥ហិចតា ផ្លូវជាតិ ១៨ខ្សែ ប្រវែង ៤គីឡូម៉ែត្រ ផ្លូវលំ ៧០ខ្សែ ប្រវែង ៤៥គីឡូម៉ែត្រ ទំនប់ទឹក ២ខ្សែ ប្រឡាយទឹក ១៣ខ្សែ ដីស្រែ ២.៩ពាន់ហិកតា៕

(សូមអានបន្ត)